(( ليه مش مطمنة )) للشاعر ~~~~ زياد الإسكندراني

ليه مش مطمنة ..

=============

يا حبيبتي 

قلقانه ليه ..

وليه ..

مش مطمنة ..

وليه ..

سايبه الأحزان ..

تاخدك بعيد ..

بعيدعننا ..

يا حبيبتي ..

الحياه فيها وفيها .. 

وانتي يا حبيتي ..

فيها أحلى ما فيها ..

إنتي ضحكنا ..

وإنتي فرحنا ..

الونس 

والحضن ..

اللي بيلمنا ..

***

يا حبيبتي ..

قلقانه ليه ..

وليه ..

مش مطمنة ..

 يا حبيبتي

ما يهمكيش ..

م الزمن وأيامه  ..

وهمومه المُزمنة ..

دا مهما سرقوا 

الفرحة ..

من نني العين ..

وحيرونا 

بين وبين ..

 وتوهونا 

في سكتين ..

مش ح نتوه 

يا حبيبتي 

عن بعضنا ..

***

يا حبيبتي 

قلقانه ليه ..

وليه ..

مش مطمنة ..

رح ناخد 

منها إيه ..

 إيه .. غير 

المقسوم لنا ..

خير كان ..

وللا شرور ..

شدة حيل ..

وللا حيل 

مكسور..

آهي دايرة 

يا حبيبتي 

وبتدور ..

مرة هناك ..

ومرة هنا  ..

***

يا حبيبتي 

قلقانه ليه ..

وليه ..

مش مطمنة ..

إضحكي 

يا حبيبتي ..

وإطمني ..

دا اللي فوق 

ربّنا ..

هو وحده 

اللي بياخد ..

وهو وحده 

اللي بيدي  ..

وهو وحده  

يا حبيبتي ..

اللي عليه رزقنا  ..

============

زياد الإسكندراني