(( ف ليل البرد )) للشاعر ~~~~~ رضا ابو الغيط
ف ليل البرد
كلمات الشاعر / رضا أبو الغيط
**********************
ف ليل البرد سقعانه
وطالبه ف قلبى تتدفى
وجايه تبكى زعلانه
لمركب تايهه م الدفه
وطاب ليها أكون ليها
مكان الننى ف عينيها
لكن خايف أغوص بيها
بحور العشق واللهفه
بتتحايل على قلبى
يكون ليها بنيه
يدفيها ويحميها
ويخلص ليها ف النيه
وأنا واقف ومتمسمر
وخوفى عليها زاد أكتر
لكون خيخه ومقدرشى
أشيل الحلوه ف عينيا
لقيتها قربت منى
ونن عيونها ف الننى
وهمست ف الودان كلمه
وقالت إمتى ها تعنى ؟
أديك شايف غراب هايف
بيتحرجم على الاشجار
ومستنى يولى الليل
ويقتلنى ف عز نهار
وييجى بإيده يدفنى
أديك شايف جيوش البوم
ليلاتى تقوم
وتبنى ع الحدود قبرى
ومن صبرى بقول لسه
ميعاد موتى عليه بدرى
وبستنى يعود ابنى
ويحلف تانى ما يسبنى
ويهدينى شعاع فجرى
ونور بدرى
رمت لى الحزن وهمومى
على حجرى
ساعتها فوقت من نومى
وقمت اجرى
وقلبى فط من صدرى
ونادى يمامه بتدور
على ولادها
تكون زادها وتسعدها
فقلت آخد انا بإيدها
وأسندها
وأعدى بها بحور الليل
واشوف الويل
وأغزل م الشقى صبرى
ولو طلبت كمان روحى
فداها روحى انا وعمرى
************************
ليست هناك تعليقات