لوحدى .. وسطكوا الشاعر/ مدحت عطية

لوحدى .. وسطكوا

 

لاقيت الدموع أقرب

ليا .. منكوا

لما كنت لوحدى

وأنا وسطكوا

لاقتنى كتير بسافر

وأنا .. جنبكوا

وأدوق طعم الغربة

مع إنى في حضنكوا

حيطان

بينى .. وبينكوا

مش قادرين تجونى

ولا قادر .. أجيلكوا

مش حتسمعونى

لو يوم .. ناديتكوا

مش أنا

إلـ عليت .. الحيط

أنا ياما جيت

ياما وقفت

ياما شبيت

بـرىء

مش أنا إلـ بنيت

على بيتكم .. بيت

مش أنا إلـ أخدت

الحلم .. وجريت

غريق

وموجى .. مخاصم شطكوا

وأنتم بعاد عنى

وأنا تايه عنكوا

لوحدى

فى أرضكوا

لوحدى مع إنى

معاكوا .. كلكوا

مدحت عطية