الشاعر عبد الله الهوارى الى الخال الابنودى فى ذكراه الاولى
الى الخال الابنودى فى ذكراه الاولى__________
_________________________
فاكرينك يا غنوة حلوة من الزمن اللى فات
فاكرين حاجاتك وحكاياتك والغناوى والجوابات
تحكى وتقول ف حكاوى
مواويل بترقصها غناوى
على جيتار لامبو
فاكرين كل حاجة والقاعد بيحكى للى جمبه
وعدى النهار
وماكانش فاضى
والمغربية جات
بشكلها الكئيب اللئيم
والكون مش راضى
وهبوا الثوار
والثورة راحت منها الحاجات
وانت رحلت
وحصلت حليم
اللى كان الحلم مزروع ف صوته
واللى يغنى من خيبته
يبقى ذنبه على جنبه
يروح ما ياجى
والواد حراجى
ما بيبعتش جواباتك
وفاطمة ل اخرى ما بتقراهاش
الحالة كوبيا
السد راح اثيوبيا
وجزر فى المالح ما وصلنهاش
كل يوم فى حاجات جديدة
وحكايات
بس الاكيد انها مش حلوة زى حكاياتك_____________
___________________
عبد الله الهوارى
ليست هناك تعليقات