__________ شيطان الحقيقة عبد الله الهوارى
خطوة فريدة من نوعها مستشفى قوص تستغنى عن شركة الامن القائمة بعملها منذ 4 سنوات وتستبدلها بشركة اخرى وتستغنى عن كل افرادها بالكامل رغم الاولوية والاقدمية
____...
ما كانش عارف ينام
مرة يلعب ف النت
ومرة يفكر ف البنت
اللى سرقت ايامه
وفص ملح وداب
مرة يفكر ف حاله
اما سلم الجفن ع الجفن
ادن ديك الفجر
قام
لجل يصلى الفرض
فجاة نور الاوضة احمر
لقى قدامه عيون حمر
واحد قاله اقعد
راح قاعد
انت ما تعرفش انا مين؟
مساكين يا بنى ادمين
_ انا عرفتك
طب خلاص
اقعد نتكلم
حتصلى وتنام
يعنى وراك الديوان
انت خالى شغل
النهار على رجليك
والليل مش عارف النوم
_ ايوة معلوم
هو يعنى لما تشتغل هتغتنى
ولا يعنى
هتهنا البال
اللى معاه مال
معندهوش صحة
واللى ف صحة ماعندوش عيال
هو كدا الحال
_ تمام
يالا انا خلصت الكلام
اسيبك لضميرك
والحق حد غيرك
وراح ماشى
فضل هو متبرجل
لا عارف روحه قاعد ولا ماشى
راح طلع من درج المكتب
كوتشينة
يلاعب روحه
الواد يقش
والشايب يكش
والبت تضحك على روحها
لما الصبح قال يا صبح
دخل اوضته يكمل نوم
بعد العصر بعصر
قام
لا صلى فجر ولا ضهر
وراح ع القهوة
لجل يستهوى
طلب شيشة وقهوة
خلص قهوته
ونفخ دخان شيشته ف الهوى
طلع ف الشارع
شارع يدخل ف شارع
فضل يلف لحد الفجر
وقال اروح
بدال ما انا متسوح
احكى وارغى
مع ابو عيون حمرة
وان ما جاش
العب مع روحى كوتشينة
__________
شيطان الحقيقة
عبد الله الهوارى
ليست هناك تعليقات