بقلم محمد عبدالمقصود داود =لو فيه كلام كنت اقوله
=================لو فيه كلام كنت اقوله====
^^^^^^^^^^^^^^^^^^^^^^^^^^^^^^^^^^^^^^^^
با أمد فى عمرك اللى انقطع
بكام حدوتة و حكاية
ومغموسة بمر الوجع
وافرد سجاجيد الدعا
يمكن اشوف طيفك رجع
يا لحن لسه با عزفه
واسمع تراتيله فى السما
يا غنوة العمر اللى سما
لسه فى ايديا لحظة دفا
من نهر حبك اللى ما جفا
يا شراع فى بحر الليل
والمينا عيونك المفرحة
الريح فى بعدك
مذبحة
والجرح ما عاد له أطبة
او دوا
والكون دروبه ضيقة
فى عينيك
كنت اشوف للصبح زقزقة
الضلة كات حضنك
اسند همومى فى حجرها
تتفرفط الاهات
ويتفرفط مرها
كنت افتكر عمرى يوازى عمرها
لكن السنين غدرت بعهدها
ح نتعاتب فى ليلة شتوية
وترُمى عضم الوجع فيه
يا ساقية بالصبر دوارة
تسقى العطاشا عسل
اه لو كان يطول الاجل
وتفرعى
جوا الصبايا امل
آه يا نيل و اتسرق منا
الكل لسه عطاشا
والحب غاب منا
باافتح بيبان دواليبك
القى السنين والسنين
بتطل تنا جيكى
يا شايلة هم الهموم
لسه الامانى غيوم
والموجة واخدانا
يا ضحكة الاوليا
يا كلمة ربانى
غابوا الاحبة كلهم يوم ما غاب
وشك وجفانى
ح امشى حدا قلبك
اياكى
تقفلى قبرك او تنسى حرمانى
============ محمد عبدالمقصود داود
ليست هناك تعليقات