بقلم// طارق الصباغ ابومحمد وحشانى يا امى
وحشانى يا امى
طارق الصباغ ابو محمد
ياه يا أمى أد إيه وحشانى
ياه يا امى لو تكونى سمعانى
برغم إن صوتك دايما سامعه ف ودانى
برغم إن صورتك على طول شايفها قدامى
لكن والله يا أمى كتير أوى وحشانى
ألف رحمه ونور عليكى
نفسى أحكي شويه عنك
نفسى أفضفض باللى أخدتوا منك
عايز الناس كلها تعرف
إن أخلاقي طيبتى تربيتى بسببك
انا مش محضر فى دماغى كﻻم
أى حكايه هأحكيها ليكى
تستاهلي يا أمى عليها وسام
جه فى باللى دلوقتى وأنا بكتب
أيام مرضك و أنتى بتبكى
كنت بقولك حاسه بايه
وفين الوجع اللى مبكيكى
وجع وﻻ أى وجع يا ضنايه يبكينى
بس صعبان عليه أنتم يا نور عينى
مين يا حبيبى راح يراعيكم
فى أيام هتكون صعبه عليكم
حتى فى أشد حالات مرضك
فاكر يوم كنت أنا جنبك
قولتيلى قوم يا أبني اسندنى
عايزه أقوم أتوضي ياسندى
جيت وحاولت أشيلك يا اما
وقعتى من إيدى وفضلتى تبكى
بوست على راسك معلش يا أمى
انا إيدى سابت غصب عنى
ألاقي صرخه تقولى يا وﻻدى
مبهدلاكوا معايا أنا يا وﻻدى
معذباكوا معايا أنا يا وﻻدى
يا رب خدنى وخفف على وﻻدى
جريت دموعي زى سيول
واترميت فى حضنك انا على طول
ومهما أقول وأقول وأقول
ميكفيش العمر كله أقول
إنك والله يا أمى كتير أوى وحشانى
ياه يا أمى أد إيه وحشانى
ياه يا أمى لو تكونى سمعانى
برغم إن صوتك دايما سامعه ف ودانى
برغم إن صورتك على طول شايفها قدامى
لكن والله يا أمى كتير أوى وحشانى
تحياتى
طارق الصباغ ابومحمد
21/3/2015
ليست هناك تعليقات