يا عندليب حاضر لم تغيب الشاعر عبد الله الهوارى
يا عندليب
حاضر لم تغيب
موقع ف دفتر اليومية حضور
وما دمت موجود
طبعا دارى بالحاصل فى الوجود
بجمع مجموع الحواصل
نتج حلم غريب
تصدق يا شيخنا
الولاد بتوع اليومين دول عملوا ثورة
وصمدوا بشكل عجيب
وقفوا قدام القنابل
وضرب الخطوش والمولوتوف
والمدرعات اللى بتدهس وبتدوس
لكن الواضح انهم جيل منحوس
خيبة الامل راكبة جمل
الامل صار دخان ف سما الامل
بعد بعيد عن ارض الواقع واتشعلق ف حضن المجرة
البخت والنصيب
تقول ايه يا عندليب
لو كنت باقى
كنت اقله لملمت الصوروالبواقى
بصوتك اللى بيلضم الحلم ف خيط رنان
ويزرع الحرية ف النفوس
تطرح امل
يشرب من انهار وسواقى
ما يقدر مخلوق ايا كان
يطيره زى دخان ف ريح عاصف
ما دمت شايف
يا عندليب غنى
غنى للثورة وبشايرها
لملم م الريح ضفايرها
خلى صوتك ينشر عبيرها
ان لم تغنى
تبقى الثورة دى وغيرها
ثورة بالتبنى
امها خرم ابرة وابوها شكة دبوس
ليست هناك تعليقات