بقلم ......( حسني الجنكوري ) . السيد قراره عبد الجواد ( الجزء الاول ) ..
السيد قراره عبد الجواد ( الجزء الاول ) ..
؟********************************
- صباح الخير يا سي السيد.
- صباح الخير يا امينة.
- لي عندك طلب يا سي السيد...يارب ما تكسفني فيه
- خير يا اأمينة.؟؟!..اللهم اجعله خير!!!
- نفسي رايحة لأكلة فسيخ ورنجة يا سي السيد.
- اوعي تكوني بتتوحمي يا أمينة؟؟!!
- يظهر كلامك صحيح يا سي السيد!!!
- يا نهار اسود ..ومن امتي الكلام ده؟؟!!
- من شهرين او ثلاثة .
- أنا مش قلت لك اني مش عايز اولاد...عايزه تخلفي مني بالعند يا أمينة؟؟؟!!
- أبدا يا سي السيد ربنا يخليك لينا كنت عايزه اعملها لك مفاجاة..واخلف لك عيل من ريحتك.
- هو انا ناقص خلفة تاني ؟؟؟! انت مش شايفة خلفك شكله ايه يا امينة ...انت مخلفه لي عاهات يا أمينة.
- ليه يا سي السيد ده خلفك زي الفل ماشاء الله عليهم وربنا يحميهم
- قصدك تقولي زي الزفت...أبنك الكبير طلع من كبار تجار المخدرات...والتاني مزدوج الجنسية..والثالث بيغسل اموال ومغتصب اراضي الدولة وبيتحصنوا في اسمي!!!!!....( البقية نتبع ). ..............
******************
.
السيد قراره عبد الجواد ( جزء ثاني ).
************************************
- ليه بتقول كده ياسي السيد...ربنا يخليك ليهم ويعيشوا في حمايتك واسمك.
- انا لما بنقابل مع حد يعرفني ويجيبلي سيرتهم بنقول يا ارض انشقي وابلعيني من فضايحهم.
- دي ولادك ياسي السيد هم اسياد البلد...وبيلعبوا بالمليارات وأساميهم علي كل لسان...ينقطع اللسان اللي يجيب سيرتهم برضي.
- يا امينة انت ست علي نياتك..نايمة علي ودانك ما تعرفيش في حاجة غير الطبيخ...وعيالك اللي مقشطينك اول باول.
- وماله يا سي السيد دول لو اخدوا عنيه وكل اللي حيلتي مش خساره فيهم.
- انت لما بتوقعي يا امينة مش بتلاقي حد منهم جنبك...اللي ماحد منهم جاب لك دكنور يكشف عليكي ويعالجك..ولا يشتري لك العلاج...عيالك دول جزم قديمة...عوضنا علي الله فيهم. ولسه ح تخلفي لي تاني؟؟؟!!
- حلفتك يا سي السيد بالطاهرة وسيدنا الحسين ما تكسر بخاطرهم.
- اسمعيني كويس يا امينة....اللي في بطنك ده لازم تنزليه...انا ما خلفش ولاد بالعند فيه...عقلك في راسك تعرفي خلاصك.
- لا والنبي بلاش يا سي السيد ده انا كنت ناويه اسميه علي اسمك.
- وح تسميه ايه ان شاء الله؟؟؟!!
- ح اسميه السيد قراره عبد الجواد علي اسمك.
- اااه...تبقي تسميه في بيت اهلك هناك..انت طالق يا امينة.
..............................( حسني الجنكوري ) .
-------------------------------------------------------
ليست هناك تعليقات