مفيش بقلم الشاعر طه إبراهيم

مفيش

@@@@@@@

تسمع كتير كلمة مفيش
أصل الجعان يحلم يعيش
يحلم يلاقي اللقمه حاف
حبة غموس حبة أريش
وكتير ينام من غير ليحاف
يسمع مفيش يسأل مفيش
وكتير ف قلب الليل يخاف
الفقر ساكن قلب الجدع
يعمل حدق يضرب ودع
يمشي نحيل يرفع كتاف
يعمل كتير أم الحيل
لو حتي قرر يتمنع
يدخل رحاب أرض العفاف
يسمع مفيش يسأل مفيش
والحزن ساكن قلب الحواري
وبيوت كتير من غير عريش
كتكوت نحيل وسط الفراخ
يحلم بعشه يحلم بريش
وعجوز يزفزف جنب الحيطان
يستني هدمه أو حتي خيش
والعمر راح والقلب شاخ
يسمع مفيش يسأل مفيش
ملعون أبو كلمة مفيش
مليون حكايه جوه البيوت
تسمع تندم تسمع ألم
تسمع أمل قرب يموت
مليون حكايه مليون قضيه
والحزن ساكن قلب الصبيه
تسأل مفيش تسمع مفيش
ملعون أبو كلمة مفيش
والواد حميده ابن الشويش
عمال يزغط ف المعيز
يسرق حمار يشرب حشيش
استاذ كبير ف البلطجه
ويشوط شباب المنطقه
ويموت كمان ف الجليطه
والصورة دي للواد عليش
عمال يسبسب ف الكنيش
وخناقه دايما ع البنات
لا يخاف نظام ولا حتي جيش
وان حد قدم فيه بلاغ
تبقي الرشاوي وخد وهات
والقرش قادر يعمل حجات
وكمان أبوه مسؤل كبير
يركب حصان يلبس حرير
والدنيا دي كانت مفيش
ملعون أبو كلمة مفيش
يا دنيا ثوري ع الفساد
خلي اللي جاي يعرف يعيش
الحزن زاد والقهر زاد
و حكاية تانيه ما تتحكيش
والسيره لفّت ف البلاد
والناس غلابه ما تفتريش
وحوار طويل ف الاقتصاد
ف الصخر تنحت متلإيش
ومظاهره مره واحتشاد
مليون خناقه عشان تعيش
والحزن ظاهر ع الولاد
والزحمه دي ما بتنتهيش
والحظ سايق ف العناد
مسمعش غير كلمة مفيش
وعروسه لسه ف الحداد
خايف عليها ما تتعميش
الفرح طار رغم الوداد
مين يا تري يقدر يعيش
وشعور عميق رغم السهاد
وعيون حزينه ما تتداريش
والصوره دي ماليه البلاد
موال كبير مابينتهيش
يا دنيا ثوري ع الفساد
خلي اللي جاي يعرف يعيش

@@@@@@@@

بقلم / طه إبراهيم