( صرخة شعب )☆ بقلم مبروك علوه

 

☆( صرخة شعب )☆

آه يا بلد على طفل أتظلم لما أتولد
على فقير تعبان مش لآقي المدد
ولكل فساد ونصب محتاج لهدد
على ظالم عايش ولا مره لله سجد

أه يا بلد مليانه عصابات
باعوا الضمير بحفنة دولارات
ومسئول طماع يقولك هات
ياصرخة شعب كلها أهات
في ناس ماسكين الدنيا بايديهم
تاخد من الغلبان قوته وتديهم
وناس نايمه ما فيش حاجه تدفيهم
فى الشارع مش لاقين مكان يداريهم
في ناس من الفلوس شبعانه
عايشه سعيده مشفتش إهانه
وناس من ذل الفقر جعانه
مريضه وبيقولوا فين حق دوانا
فيكي الغني بيتشال ع الراس
والحرامى متهنى ويتباس
وفي اللي ما يملكش مداس
متهان وتحت الجزم ينداس
فيهم اللى بيصرف بالألافات
وبيشرب بيهم مخدارات
أصله غنى وابن ذوات
ورث ملايين لما باباه مات
عايشين بياكلوا اسماك ولحوم
وبسين في جنينه جواه بيعوم
مش حاسين بفقير محروم
ولا بمديون غرقان فى هموم
في شباب كتير ضايع
مرمي فى الشارع وصايع
مش لاقى شغل والكل بايع
برغم إنه يملك سبع صنايع
☆☆☆☆☆☆☆☆☆☆☆؛
مبروك علوه