شعر / محمود مسعود لحظة جواها ....!!!
لحظة جواها ....!!!
ــــــــــــــــــــــــــــــــ
سنين مرت
والدمع م العيون اتحجر
يوميا نشوف مناظر
من جوه سوريا
بتقول الكل ناظر
ما رق قلب ثانية
علي بيموت م الجوع
يصرخ لكل الدنيا
صوته مش مسموع
الكل يجري يصور
دمار وموت موجوع
مين بيحارب مين ؟؟
لا حد منكم انتصر
ولا جبتم م الديب الديل
طوابير الموت مرصوصة
جوه بلادكم وبراها
العزيز فيها بقي ذليل
يبيع لحمه عشان يعيش
لحظة جواها
لو ما متش م القتال
أو م الخوف
أو من دانه مقصودة
حيموت فوق مركب
وهو بيعدي قنال
في البحر مجهولة
حاصرتم ناسكم
دمرتوا بلادكم
لصالح مين ؟؟
رفضتوا العزة
في مجرد جلسة
تتوافقوا فيها
حاميها حراميها
والعالم مبسوط
يمصمص في شفايفه
قدام الكاميرات
وخيبتكم معروضة
في كل القارات
الطعم أكلتوه
والدم شربتوه
وبلدكم ضيعتوه
الغريب دخلتوه
وحرماتكم منحتوه
ياحزني ع اللي انتوا فيه!!!
ــــــــــــــــــــــــــــــــــــــــــــ
شعر / محمود مسعود 9/1/2016
ليست هناك تعليقات