امتى النهار يبدر خضار بقلم رضا ابو الغيط

امتى النهار يبدر خضار
على ارض بارت م الوجع
على قلب صابه الانكسار
وف انتظار ...نطفة جدع

يروى الشراقى ف حضنها
وبين رموشه يضمها
يبقلها من تانى الحياه
توهب له باقى عُمرها
ف نهارها يبقى ضلها
وفرحه يبقى فرحها
وف المسا وقت الأسى
يشيل حمولها وهمها
يكون صلاح وقت المحن
يلقاها بنيه وسكن
يكون لها نور شمسها
يلقاها ف الدنيا الوطن
ترسم معالم ضحكته
على وشها وف قلبها
ولو ف يوم فات سِكته
يرجع قوام ويضمها
تمسح بإيدها دمعته
وتضمه ليها تسكته
وقت الضنى كل الضنا
يحتاج تملى لأمته
رضا ابو الغيط