(( رقص الحروف )) للشاعر ~~~~~ رضا ابو الغيط
رقص الحروف
كلمات الشاعر / رضا أبو الغيط
****************************
ابتدى رقص الحروف
فوق سطورى المهجورين
اللى عانت م الظروف
واللى تاهت من سنين
بس لسه الحرف خايف
أصله شايف ألف دايره
والرحايا لسه دايره
ع الضحايا المطحونين
ابتدى قلمى اللى شاعر
بالمشاعر ..واللى هاجر
يرسم الحرف بعنايه
فوق ثنايا سطر غامر
وسط كرُاسى اللى ساكن
فوق رفوف جوف المساكن
وابتدى الحرف اللى بعده
صوته يعلى ف الحناجر
والحروف بتقول لبعض
اوعوا يوم يمنعكوا سد
شبكوا ايديكم ف بعض
واكتبوها كلمه جد
م النهارده
اللى فاضل بس يارده
والسكوت يبقاله حد
وابتدى لون الأمان
يترسم فوق الميدان
فتحت كل الزهور
فوق سطور الامتنان
واللى باع حرفه ف يوم
واللى كان يشبه لبوم
لما شاف الحرف قام
خاف يقرب م المكان
وابتدت كل الحروف
من غير كسوف
م الفرحه ترقص ع السطور
تقتل الصمت اللى خيم ع الكتاب
والعذاب
والضلمه قاعده ف انتظار
تاخد قرار
تسقى من تانى الحروف
كاس المرار
عشان م ترقص من جديد
فوق حبال المشنقه
والرقص يبقى محرقه
يبقى انكسار
بس الحروف دى مصممه
ترقص على لحن انتصار
رغم اللى كان
رغم الحصار
لسه الحروف متحزمه
بشعاع نهار
ليست هناك تعليقات