(( سيبها يا قلبي )) للشاعر ~~~~~~ احمد صبري

سيبها يا قلبي
احمد صبري
-
سيبك يا قلبي منها
وابعد عنها
سيبها تشوف نصيبها
انت مش ادها
هية تستاهل كتير
هية ست البنات
وانت معندكش غير
دموعك والاهات
-
عارفك يا قلبي عاشق
وكمان محتاج لها
مشتاق وشوقك راشق
عينيها وحضنها
لكن هاعملك ايه
انت عارف تمامك
بتبكي ياقلبي ليه
على اخر احلامك
-
مافيش ادامي طريق
عشان اوصل لها
حياتي ماتسوى شيء
هدية لحبها
ارحم عذابي يا قلبي
افهم معاني الكلام
اخرك عايش تعبي
احزان جوه الالام
-
عمرك ما عيشت حكاية
انت اختارتها
ماهو لو عندك مرايا
كنت كسرتها
هتشوف واحد ضعيف
متعود ع الهزيمة
دبلان لون الخريف
خسارته مستديمة
-
حبيتها ياقلبي عارف
نفسك تروح لها
في حنانها والشفايف
حياتك شوفتها
سيبها ياقلبي تعيش
ادعي لها بالسعادة
وخد كمان بقشيش
وابقى اشربها سادة
-
سيبها يا قلبي وابعد
خيالك انتها
بلاش تكدب وتوعد
عشان بتحبها
سيبها وروح لحالك
الله يسهلها ليك
ومهما تيجي ف بالك
صلي بدموع عينيك