يا نن عيونىكلمات الشاعر /رضا أبو الغيط

يا نن عيونى
كلمات الشاعر /رضا أبو الغيط
******************************
يا نن عيونى عاتبينى
ما فيش مانع تخاصمينى
ما فيش مانع تحاسبينى
لكن عندى ميتين مانع
تفوتى القلب يا عينى

تعالى بينا نتعاتب
تعالى بينا نتحاسب
ولو غلطان تسمحينى
ولو غلطانه يا عمرى
برمش العين تصالحينى

ما نيش قادر على بُعدك
وجرح القلب من بَعدك
يبات الليل ومستنى
كلام العشق يوصلنى
ويمسح لى دموع عينى

بتسألنى نجوم الليل
على قلبى وع المراسيل
تشوف الدمعه ف عيونى
وآهة قلبى وجنونى
تبات تبكى مع سنينى

وتتحايل على شمسى
تحس بيا وبهمسى
وتصرخ ف اللى فاتونى
يفوتوا الدنيا ويجونى
عشان تسكت دموع عينى

يا نن عيونى عاتبينى
يا روح القلب حاسبينى
بلاش نورك يغيب عنا
بلاش تبقى الدموع بينا
ياساكنه القلب وف عينى