(( مطرود )) للشاعر ~~~~~ أحمد صبري

كلامك دبحني وذاد وجعي
كنت بفتكرك معايا وتبعي
واكتشفت اني
هعيش غريب واموت غريب
واني مطرود م الوطن
اكتشفت اني
ماليش حبيب مفيش نصيب
غير اموت او اتسجن

او ارحل بعيد هربان
من تهمة معملتهاش
وياريت كان ليا مكان
او الهروب ببلاش
انا اكتر واحد حبها
انا اكتر واحد حبكم
لا خونتكم ولا خونتها
الله يسامحكم كلكم
-----
شايف الي بيحصل هناك
عند دول ودول ودول
اسكت انت ايه دراك
ومين هيسمع لو تقول
دول معاهم ربنا
دولا حاميين ارضنا
هما طولنا وعرضنا
وحتى لو منهم فلول
دول تاريخنا ومجدنا
دولا ناس بتحبنا
والفقير له عندنا
الف وخمسين مسؤل
ارحل انت هي تعمر
روح طريقك اخضر
هنا مفيش الا عنتر
وبيعمل احلى حاجات
هناك هتتعشا وتفطر
هتشتغل وتكسب اكتر
ولما راس مالك هيكبر
تعالى او ابعت تحويلات
------
حاضر ماشي يا امي
هبعد يا حبيبتي وعد
خسارة في المي همي
كان جزائي الطرد
عشان بقول الحقيقة
اركب مركب غريقة
اولع في اي حريقة
وابقى انا الغلطان
حقك عليا يا بابا
مع انك م الغلابة
صدقت ناس كدابة
مطرود منك كمان
عم يا بتاع العرب
عم يا بتاع الهرب
لانا خاين ولا جرب
ويشهد ربنا المعبود
انا اللي وقفت للظالم
وقت الكل كان نايم
فرقونا ومين فاهم
انا ليه بقيت
مطرود