(( قولي يا مرايتي )) للشاعر ~~~~~~ طه إبراهيم

قولي يا مرايتي
********
لما عينيه جات ف مرايتي
قلت الصوره لايمكن صورتي
شايف عيني وشايف قورتي
شايف شخص كبير قدامي
خايف خايف تطلع صورتي
اللي أنا شيفه واحد تاني
يمكن حُر و يمكن جاني
يمكن جاي من عالم تاني
إنسان شايل هم كبير
شعره مطأطأ م التفكير
قلبه الغامض زي البير
شايف دمع ف نن العين
الموجود ف الصوره حزين
ساب الدنيا بقالو سنين
عايش ف القرن العشرين
أنا مش هو الشخص الباين
يمكن شخص مزيف خاين
ويمكن يطلع شخص أمين
عمال أدقق عيني وعاين
شفت جراح والالام وأنين
قولي يا مرايتي هيطلع مين
أيوه أنا حافظ شكلي كويس
انا مش نايم و لا بهيس
أنا مش واحد باكل طين
أيوه أنا فاكر شكلي كتير
كل ملامحي قدام عيني
انا محتاج حد يصحيني
أي شعور مش هيكفيني
قدام عيني شخص حزين
قولي يا مرايتي هيطلع مين
أيوه أنا فاكر شعري الاسمر
تجاعيد وشي لما أفكر
نظارات عيني لما أتأثر
أيوه انا فاكر قلبي الاخضر
لما اتجمل و لا أتمنظر
فاكر حلم حياتي الاكبر
قدام عيني طموح وحنين
قولي يا مرايتي هيطلع مين

********
بقلم / طه إبراهيم