( عملنا عبايط ) ,,كلمات احمد فارس الينايري

................ قصيدة جديدة للينايري ...............................

,,,,,,,,,,,,,,,,,,,,, ( عملنا عبايط ) ,,,,,,,,,,,,,,,,,,,,,,,,,,,,,,,,,,,,,

قالوا يلاّ نغني
قلت لمين ؟
قالوا لبلادنا
العيون بكت
قلت علي مين ؟
قالوا علي بلادنا
خبّيت دموعي
و جيت اغنّي وتري اتقطع
قلتلّهم ما تغنّوا
قالوا الحزن سبقنا
يا اصحابي لحني لسة فيه الروح
و نقدر نمسح دمعتنا
قالوا لحنك بينزف
ماتحولش
مش هيسمعك
و لا هوّه هيسمعنا
عودك خلاص اتكسر
ماتحولش
و تعالي ابكي معنا
ايه اللي فاضل من كلامك
لو قلمك لسة بيحابي
قلّه يسمعنا
الحزن غطّي الوشوش
و النور في العين مات
دا احنا من كتر الحزن
شايفين عصافير الفرح
بتبكي معنا
قلنا كلمة تفرّح
او حتي امل كدّاب
شوف في لحنك
اي حاجة تفرّحنا
خيولنا خلاص ملّت
و الرمل اشتكي منها
احنا خلاص راجعين
قول لخيلك يطعنا
احنا عارفينك
انت مستنّي ابن الايوبي
يقوم من قبره
ويجي يحارب معنا
انت موهوم و عبيط
ده مات مطمّن
علشان سايب وراه
خيول هتكمّل
بس احنا اللي منعنا
اتفرقنا في الف درب
و تاه صوتنا
و نسينا صلاتنا و قبلتنا
و عصينا الرب
و طعنا الكلب
اسألهم فين سيوفكم و رماحكم
قوللهم مين عدوكم وعدونا
مش عارفين عاشان همّه
اتعلموا في مدارس البشوات
علّموهم ان الرقص حضارة
و التنازل عن الأرض سماحة
و السكوت عن الحق فضيلة
و البلادة من سمات حضارتنا
بلاش كُتر كلام
و قول لخيلك يرجع معنا
احنا عارفين اللي هاتقوله
خيلك زي خيولنا
رجليها ماسكة ف الرملة
مش واخدة ع الخيبة
بس هوّة كده قدرنا
احنا هنرجع
و انت طبعا معنا
السودان مليانة سيوف
بالف شكل والف لون
و احنا يا دوب كام سيف معنا
الغزاه عارفين الطريق بالخطوة
في السودان و جيرانها
و جيران جيرانها
و احنا لو قلبنا تاه مين يرشدنا
خيولنا خافت من حيرتنا
لسّه مُصِر تروح يا فارس
يا امّا نعقلك يا تعقلنا
احنا يادوب كام واحد
دي حتي النملة عرفة عددنا
لو دخلنا عليهم هنموت
من قبل حتي ما نرفع سيوفنا
عاوز تروح روح
احنا راجعين لولادنا
هانقلهم لقينا العروش خاوية
و العرب كلهم جبنوا
و احنا كمان بخلنا بحياتنا

* * * * * * *

يا شهيد انا السودان
روح يا شهيد و استشهد فيها
السودان من زمان عطشانة
و مستنّياك انت اللي ترويها
أنا اليتيمة
و اخواتي من زمان ماتوا
لمّا سابوا عدوّها يقطّع فيها
أنا عارفه
سيفك مش هيطول الشمس
و لا هيسيع كل أراضيها
بس موسي نجّي شعبه من الغرق
بعصايا و علي الميّة ضرب بيها
و فرعون الجبّار القادر
شعبه جبن و خاف يخونه
فخانه عقله لمّا صدّق
ان ميّة موسي ممكن يمشي عليها
" الكترة تغلب الشجاعة "
مين اللي قال كدة
و ازاي موسي
قدر علي الميّة بعصايا
و فرعون بملكه
ازّاي مقدرش عليها
يا فارس عدّي السلك و خطّي
و ارسم بعصايتك ع الرملة ميّة
و خلّي خيولهم يشربوا منها
و ارسم رماح بطول الظلم
و خلّي عيونهم تحتار فيها
و ارسم خنادق ملهاش اخر
و خلّي عقولهم تتوه فيها
و ارسم لغم يفجّر نغم
و خلّي خيولهم تدب عليها
و ارسم طريق يودّي لبّرة السودان
و قبور عطشانة و جعانة
و بطونها خاوية و مسعورة
و سيبهم مع جُبنُهم
يقوللهم ع اللي فيها

___________________________________________
كلمات احمد فارس الينايري
اهداء ..... الي الشعب السوداني الموحد .... و الدوله السودانية الموحدة
اليكم كل اوجاعي .....