سلام يا صاحبى *-* بقلم الشاعر / شعبان المصرى
تحية إلى من يضحون بأرواحهم من أجل بقائنا
إلى كل شهدائنا من القوات المسلحة وجهاز الشرطة
سلام يا صاحبى
كان قلبى حاسس إنى
مش راح أشوفة تانى
لمع بيادتة وجهز
البدلة ف ثوانى
وكأنة عارف إن
دى اللحظة ألاخيرة
نضف سلاحة
وعد بإيدية الذخيرة
وقالى والفرحة ف عيونة
سلام ياصاحبى
مش عايز أسيبك
بس أنا مشتاق لربى
وسلامى للقائد
ولاصحابى العساكر
وقولهم إنى على
الجنة مسافر
وإدانى دبلة
وصورة لأبنة يادوب بيرضع
وقالى وصلهم لآهلى
وقولهم مقدرش يرجع
وقول لآمى
إبنك فدا وطنة وبلادة
وبلاش دموع
لآن دة أجلة وميعادة
سلم علية وراح
بسرعة لخدمتة
زى العريس
فرحان بليلة دخلتة
ملحقتش أشغل
نفسى حتى بحاجة غيرة
ولقيت رصاص الغدر
بيحدد مصيرة
راجعلى صاحبى
وللآسف غرقان ف دمة
وكلفونى إنى أوصل
جثتة لآبوة وأمة
أمة إللى كانت حاسبة
لميعاد ألاجازة
لقيتنى راجع بأبنها
شايلة ف جنازة
قالت بخوف مين دة إللى
ملفوف ف العلم
مقدرتش أنطق
م الوجع ومن ألالم
قالولها دة إبنك
يأم الشهيد يأم البطل
ردت بإيمان وبيقين
إذا أراد الله فعل
قالولها إبنك
راح ضحية غدارين
ناس ف الحياة
عايشة ماتعرف أى دين
مالت وحضنت
جثتة جوا الكفن
وقالتلة كلمة واحدة
قبل ما يندفن
ررررررروح يا إبن عمرى
رررروح يا إبن عمرى
قلبى وأنا راضيين عليك
روح للى خلقك
روح للى خلقك
هو ربك أولى بيك
هو اللى عندة الجنة ونعيمها
سيبنى أنا ف الدنيا وجحيمها
ربنا يصبرنى على بعدك
صعبة الحياة ياضنايا من بعدك
وقعدت جنب أم البطل
وببوس إيديها
جايز تهون اللحظة
على نفسى وعليها
حطيت إيدية ع الكفن
وحلفت ليها 100 يمين
مش راح يضيع حقك
ياصاحبى مهما هاتعدى السنين
سلام ياصاحبى
ياللى عيشت بقلب طيب
نام جوا قبرك
وأوعدك جايلك قريب
بس ما أجيب حقك
وأخد تارك ياصاحبى
وقتها راح تبرد النار جوا قلبى
سلام ياصاحبى سلام ياصاحبى
شعبان المصرى
ليست هناك تعليقات