(( اضحكي عشان الصوره )) للشاعرة ~~~~~~ عزة أحمد الشربيني

عيشى حياتك استمتعى بيومك
لا ماضى يحطمك و لا مستقبل يقلقك
كفايه الصراع اللى عشتيه
ايام راحت عذبتك و راها ايام خوّفتك
و الاحزان سحبتك لمتاهة النسيان
دهستك ايام و رفعتك احلام
و الناس اشكال ده طيب و ده شرير
و قلبك يحزن على و جع الغير
و اللى حطّم حياتك انك عيشتى
جوه مأساتك
و صدقتى ان ده قدرك و دى حياتك
كفايه و شيلى الهم عن كتافك
و عيشى الحياة حققى ذاتك
و اتحركى برشاقه زى الفراشه
و اتعايقى بجمال الوانك
و خلى السعاده تهجم عليكى
تاخدك فى حضنها و تسعد بيكى
صحصحى قلبك دوسى على احزانك
و ارجعى تانى لفنّك و خيالك
و اطلعى فوق السحاب و انشرى عبيرك
ينزل زى المطر ع الارض البكر يحييها
تفرح ويطلع الورد فيها
و تدب الحياة فيكى و ف كل المعموره
اصل انتى انثى اسطوره
ممكن تضحكى بقى عشان الصوره
...................