(( في جناين أرضنا )) للشاعر ~~~~~~ محمد عبدالمقصود داؤد

ومهما تهب والا تدب
الارض تحب اللى يحب
والمطرة بتدور تنكش كل مكان
على اللى يحضن
عيون شقيان
ويسقيه الشبع والحب
ومهما نسرق الموال
قلب النغم حزنان على الحزنان
فمطولش فى الغيبة
طول الاشتياق عيبة
وانا فتحت صدر الفجر
اوشوش كام شعاع هيبة
يصدوا جيوش الهم والعيبة
وبا أفرح لما ألضم الفرحة
واشوف كام تسبيحة سارحة
فى ضى عيونك الجارحة
فبلاش تلبسى فستانك الكاكى
وشيلى العتمة اللى جاية وياكى
قلوب بيضا بلون القمرة سانداكى
وانا وطلة من شبابيك
الحلم وياكى
نخطى لفجر كان جوايا وجواكى
فبلاش تكسرى اللقمة
اللى مقسومة فى حمايا
وحماكى
ولاتبعترى الهمة اللى من صلبى
انا قلبى عكازى
يفتح كل يوم سكة

وعمره ما كان فى يوم غازى
ولامعادى
جناين ارضنا الخضرة تساع الكل
مهما راوها بالغدر بتطرح
كل يوم فل