(( الأكمنه )) للشاعر ~~~~~~~~ رضا ابو الغيط

محاصر بين الزوايا والضلوع
غريق ف بحر من الوجع
وف لحظه هلع
قلبى انخلع
شوفت المستقبم اللى انحنى
فوق الجدار اللى انبنى
مادد ايديه
وف عينيه شوفت الدموع
السايله من عين الكنايس
ع الجرس
يوم ما انخرس
نفس الدموع
السايله من عين المساجد
ع اللى ساجد
من غير خشوع
ع اللى سال من دمنا
فوق أرضنا
ع الجراح واللى راح
من عمرنا
ع الخطاوى التايه منا ف دربنا
واللى فاضل مننا
كاتب معاهده
وميثاق شرف
بعد ما تاه النهار
وسط المدار
بعد م البعض انحرف
كاتب معاهده
مع اللى باقى م التاريخ
واللى شاهده ع المعاهده
نقاط حصينه
متشكله جوا النفوس
صعب جدا يشتروها بالفلوس
والمعضله
لو نسينا معطيات المسأله
أو ف يوم الشفره ضاعت مننا
ومن حقنا
نسمع اعتراف الأمكنه
وبكل وسائلنا الممكنه
نحاول نبرهن للجميع
إنى اللى سارق فرحنا
وإن السبب فى جرحنا
هو التنافر والأكمنه