(( كنا زمان )) للشاعرة ~~~~~~~ ميرفت حمودة

ماكنا زمان بنتعلم
ونمشي للأمل مشوار
بقينا ليه بنتكلم
وأفعالنا ماليها عمار
حياتنا من هبات الله
نعيشها ازاي وباستهتار
نداري يومنا بحكاية
ونرمي ع الحقيقة ستار
نجدد ماضي متاخر
ما باقي منه غير اعذار
ونبعت للخيال حاضر
ونبني ع اللي جاي جدار
نقوم وننام مع الذكري
عقول هايمة وشوش عكرة
وواخدة الوهم ليها شعار
عشان نقدر نعيش بكرة
ونزرع ف النفوس بذرة
لابد نشد لينا مسار
وننفض عن عيوننا الخوف
ونحفر الأمل بحروف
نخلي الحلم يبقي قرار