قلبى ف خطر بقلم الشاعره الكبيره - سميره الاسريجى

قلبى ف خطر
معرفش انواع البشر
مفهمش ايه معنى الخداع
مقدرش يهرب مالقدر
قلبى ف خطر
معرفش إن الصبر مر
وان الوشوش ممكن تغر
وماشفش شىء اسمه القناع
مرسوم على وشوش البشر
قلبى ف خطر
عمال بيصرخ م الانين
سمعه انينه الميتين
والجانى اللى بيدبحوا
اعمى البصيره والبصر
قلبى ف خطر
مطعون ولا
ميت الف طعنه
كأن قلبى صايبه لعنه
اتمنى قلبى أنه يعمى
عن قساوة البشر
قلبى ف خطر
مسدوده فيه الاورده
مضحوك عليه من ده وده
ملعونه كل الافئده
اللى على هيئة حجر
قلبى ف خطر
قلبى بينزف بالبطىء
والصبر فيه عمال يضيق
محاولش قلبى يكون جرىء
او يبقى اقوى م الحجر
قلبى ف خطر
سلمت قلبى للى خلقه وكونوا
فوضت امرى ف اللى عاوز يدفنه
لله وربى الحق عنده بيعدله
والقلب لو فيه الآله
عمر الآله مابيخزله
وعمره ماهايبقى ف خطر