محمد السباعى - في عتمة الليل..

في عتمة الليل..

ونور الفجر بيصارع عشان يطلع

وبيحارب جيوش الضلمه والاشباح

وكله جراح

عشان يقدر يخلي النور شعاع يرجع

وييجي نهار

يزهَّر في الجبين نوَّار

ويكبش م الأمل كبشه

تكفي الدار وجار الجار

وترسم لينا مستقبل

وناس بالقهر ما تقبل

لا من حاكم ولا جبار

عشان احرار

نجوع .. نتعب ..

لكن ما نخاف

ولا نتذل ..

غير للواحد القهار

****

بنحلم ببكره البعيييد اللي جاي

برغم الضلام اللي عشش كتير

ورغم الضباب اللي توّه عقولنا

وضلت خطانا طريق المسير

أكيد بكره جاي

هاياخد بإيدنا لطريقنا الصحيح

وتسمع قلوبنا كلامه الصريح

بدون المواربه ولغط الكلام

وصوته بيصرخ ياعالم نيام

دا بكره ف ايديكو تجيبوه بالعجل

وتحيوا الأمل..

اللي مات من سنين

يهل النور ويسطع تاني

وينور..

قلوب ملايين..

قاست ياما من العتمه

وم الضلمه اللي ياما كحَّلت عينهم

وخلتهم ..

كما العميان

خلاص يابكره فتحّنا

عرفنا طريقنا وارتحنا

ونور الشمس هل وبان