سامحينى...............عمار الفار
ورجعت لك فارد دراعاتى
-وانا مشتاق
لآحضان اللقا الحراق
ضمينى من حقك
قلبى على قلبك
ضمينى بحنيه بعفويه
ضمينى على استحياء
صبى ملامحى فى ملامحك...
سامحينى واسامحك
سامحى اللى كان فارس
ومكسور فى ميدانك
ومهزوم على شانك
واتنفى عنك وهوه جريح
سامحى اللى كان بيمارس
محبتك فى السر
ورافض بانه يقر
ويقول بعشقك
بيخاف لصوص الوطن
تقوم تسرقك
وانا قلبى فى محبتك
عمره ما شاف تفاريح
----------------------
سامحينى لآنى كنت جبان
هزيل عيان
ومش قادر أحوش عنك
واحوش الجلد عن ضهرك
واحوش أوغاد واحوش فى كلاب
بيدنسوا نهرك
ويزودوا فقهرك
لآنى كنت جبان
هزيل عيان
بأحزان الوطن موجوع
وانا شايفه يموت م الجوع
ومش قادر أمد اليد واساعد حد
لادراعى يبات مكسور
مانا أصلى كنت جبان
هزيل عيان
ومن عشق الوطن ممنوع
------------------------------
سامحينى لآنى كنت شيطان
رجيم أخرس بنص لسان
وانا ساكت على حقك
وانا راضى على حرقك
وانا شابف اللى كان سارقك
وخلاكى وطن مسلوب
على مزان الحقوق مصلوب
----------------------------
سامحينى كنت انا السجان
غليظ القلب مش انسان
وانا حارس على سجنك
ماكنتش وقتها ابنك
لآنى وقتها السجان
بطيع الامر على عمايا
وماشوفش ارضى وسمايا
وبطاوع من تحت غمايا
لآنى وقتها السجان
ولآنى عبدها المأمور
وانا بابنى واعلى السور
وجوايا وطن مقهور
وانا السجان ببات مكسور
عشان قلبى حجر وصخور
وراجعلك أوعى تسامحينى
ولو نزلت دموع عينى
ومهما افرد دراعينى
ولو دمى روى أرضك
أوعى ساعتها تسامحينى
لآنى كنت جبان
وكنت شيطان -والسجان
وكل دول كانوا غصب عنى
وضعف منى
وانتى كان حبك ساجنى
تسمحى أقولك يا أمى
-------------------------
انسدت ياامه فى وشى كل الدروب
وراجعلك وكلى ذنوب
وفين أهرب من المكتوب
وفين أهرب واسيب حزنك
والاقى فين دفا حضنك
والاقى فين صفا قلبك
مانا عارفك
شوقك للضنا جارفك
ومهما ذنبى كان جارح
بتنسى قسية امبارح
وقلبك يامه بيسامح
سامحيني
ليست هناك تعليقات