بلاش من تاني تنسيني ، بقلم / وائل عوض و علي سليم

وعايزك تبقي عرفاني .. بلاش من تاني تنسيني

انا اللي باموت على شانك .. وانا اللي افديكي بسنيني

يهوذا خان وباع نفسه .. وشوفنا نهايته بعنينا

ومش ممكن فيوم يرجع .. ويلقى مكانه وسطينا

ح نبدأ تاني عمر جديد .. وننسى الماضي ونكمل

كاننا لسه عارفين بعض .. وماشيين سكه م الاول

وأول خطوه فطريقنا .. هقولك قلبي نفسه فإيه

يشوفك حته مالجنة .. وانول كل اللي باحلم بيه

أنا احلامي مش صعبه.. ومحتاج بس لقمة عيش

تغطيني في عز البرد .. ولو حتّى بحتة خيش

نعامل بعض بكرامه .. عشان لو حد يوم هانك

أقطع لحمو بسناني .. وح اشرب دمو لو خانك

وعايزك تبقي عرفاني .. بلاش من تاني تنسيني

انا اللي باموت على شانك .. وانا اللي افديكي بسنيني

يهوذا خان وباع نفسه .. وشوفنا نهايته بعنينا

ومش ممكن فيوم يرجع .. ويلقى مكانه وسطينا

طريقك فارشه بالحنة .. تخطي عليه وتتباهي

ومهرك دافعه من دمي .. وبرضو شويه واللهي

مكانك لسه مستني .. وسامع صوته بينادي

يقول ياللي مفيش زيك .. يا ام الدنيا يا بلادي

ما كل الدنيا عارفاكي .. بهرمك وبجمال نيلك

بسحر شمسك الدافيه .. بنسمة رقيقة من ليلك

وقفتي في وش اعدائك .. وكنتي المقبره ليهم

ولو كل البلاد تاهت .. ح تبقى مناره تهديهم