شاري للنهاية ، بقلم / أمل جمال النيلى

لما فارقت من غير ميعاد

وبقيت صورة علي الحيطان

وذكريات بين الصور

تلف و تدور ع البيبان

ما تتمحي ولا تتنسي

وعيون بتحكي

ما يخلص منها دمعها

و لا حتي كلمة منها

تواسي الجراح

لاء و الغريب في حزنها

بتوصيني علي اللي راح

في يوم غصب عنها

أصبر ُ

ومين يصبرني أنا

مش باقي ليا

غير ذكرى حلوة في بسمته

أو لمسة منه حنينه

ونظرة دافيا

تنسيني الألم

و أما الدنيا بتيجي عليا

أفتكر لمه جمعتنا

وفرحة العيد تنور بيتنا

وأهل وخلان يدقوا بابنا

تسمع الضحك

وشريط الذكريات يتوصل

يفتكروا زمان وأيام زمان

بس ده كان من زمان

مات اللي كان بيجمعهم

و اتقفل علينا باب خلاص

والعنكبوت عشش عليه

وأربع حيطان زي السجون

و الوحدة قفل على الحياة

لاعاد أهل ولا خلان

ولا ضحكة تجلجل مننا

مفيش غير الدموع

وحيطان حزينة

وشريك بيبكي

على اللي فارق

وسابه وحيد

يقاسي الوحدة والآهات

واللي يشوفه يفكره

عايش حياته

نسي اللي فارق

ما هو مات خلاص

و اتقفلت صفحته

وابتدي الحكاية من جديد

ينسي مين

هو الحبيب ممكن يتنسي ؟

وذكريات السنين

و عشرة مليانة بحنين

وكلام العشق والوعود

مستحيل يتمحي

ولو فرت السنين

تفضل صورته قدام عنيه

يدور عليه

وسط الحيطان والوشوش

يمكن تكون ذكري ناسيها

يفتكرها

وآه من شريط العتاب

إزاي بتنسي

اما زمان كنت تقول

أنت الدنيا كلها

و اجملوما فيها

نسيت دنيتي

و عشت دنيا غيري

مات اللي كان بنا خلاص

وعشت لحياتك

افتكر مين اللي باع

ومين اللي كان فينا

شاري للنهاية