قلم/حلمى قاسم عنوان القصيدة غربة الاشتياق

وحشانى والله البلد
و الأهل والخـــلان
البنت ويا الـولـــد
وشهامة الجدعان

وحشنى حضن امى
دايما تعــول همى؟
ولما تشوفنى حزين
ترقينى وتسمـــى
طيبه و نبــــع حنان

وحشانى نار الفرن
وفطيرها والرغفان
ويمامه جــوه الكن
بتــــسبح الديان

ووحشنى وز البيت
والترعه والبنكيت
والقعده جنب الغيط
لو شبر مش فدان

ف بعدى انا بســرح
ف اللمه والمطرح
والنخل فـــ بلـــدنا
وقت اما كان يطرح
يتجمــــــع الصبيان

يـــا غــربه يا بعيــده
يا اهـــــات وتنهيده
اشتاقـــــت للسيجه
واللعــب بالعصيـــان

وحشاني يا جاموسه
يا ساقيه هاتى بوسه
سامحيني يا عروسه
ماهـــو كل شئ بأوان

تعبـــان يا خلــق الله
وجعانـــى قولت اااااه
ملعــــون ابـــوه الجاه
ومفــــارقة الأوطـــان

مهما نجمّــــع قرش
غربتنا مــا بترحمش
واللقمه لـــو بالمش

اهون من انى اتهان