كلمة
لفت تجايف حواريكى ولياليكى
تتشعبط على شجرة صفصاف
تطلع ما تخاف
تتنطط على تقاسيم الغيط لاخضر
ويا المحرات
وتلف تدور مع ساقية هناك
على راس الغيط
تغطس فى الميّـة وتتلعبط
تتبل حروفها ف عز البرد
وفرحانة........ودفيانة
وتطير من شفة على شفة
بلبل خفة
وتحط النغمة ف مواويلك
وتخش قهاوى الحارة
الكمشانة ف حضن الدخان
تدخل بسلام .....تخرج بسلام
وتسلم ع الست مليحة بتاعة الترمس
فى ودانها بتلعب وبتهمس
تضحك ....تضحك يا سلااااااااام
تتدحرج ع السكة
الواصلة لحد عنيكى
وتبوس رمشك ...وتهنيكى
وتشوف فيكى ..أحلى ما فيكى
مش كلمة شوق ..وغرام
وحنين وهيام
دى ف برج حمام
قلب عشوشه
وتحنى عيون الزغلولة
وتروح لهناك ع البنية
تختار زغلول ..صافى النية..وتجمعهم
كلمة
ع النخلة المدبوحة جدورها
تروح تواسيها
تجمع شرايينها ....تداويها
وتحط الشريان ع الشريان
ووريد فى وريد
وترد أكيد ......الروح فيها
تكبر .تطرح
ترمى رطبها على كل ولاد الحى الجعانين
كلمة خرجت
من أنفاس صدرىالمخنوقة
كلمة تطرى شفايف قلبى المشقوقة
كرمشها جفاف الوقت الغرقان
فى مطامع ومزاعم من كل ملوك الغربان
كلمة
على ورقة قلبى احلم بيها
تخرج من سجن سطورها تجيب شمسك
وتزيح الليل بحروف واثقة
ترفع حسك............إرفعى حسك
تدى ال عايز ....وال مش عايز
كلمة بقولها.......يمكن توصل
يمكن ...........جايز
جـــــــــــــا يز
ليست هناك تعليقات