ياواخدة القرد ، بقلم / بهاء الدين بدوي

ياواخدة القرد

على ماله

يغور القرد

مع ماله

وطمعنجي

بنى عمارة

فلسنجــي

سكنها له

تسيبي الناس

ويغــــرك

بوز النسناس

وطول ديله

بكتر فلوسه

هيذلــــك

وهيخليكي كارهة

الدنيا وخياله

يابنت الناس

تعالى أقولك

وأنا خبرة

بحال الدهر وأحواله

دا شاب فقير

وبيحبك وبتحبيه

معاه الدنيا

تحلى لك

وتحلى له

وتبقي دنيته وماله

ونجمة ليله وهلاله

وإيد على إيد

خيركو يزيد

ورزق المولى

هيجيلك وهيجيله

تعيشوا في

تبات ونبـات

وتبقي أم لعيالـه ..

وفرحه وبسمته وسعده

ولحن غناه وموالـه

هاأقول من تاني

وأعيدها لك

وأعيدها له

وإسمعي مني

وأنا خالـو

ياواخدة القرد

على ماله

يروح المال

ويبقى القرد

على حاله