رسالة الى أمي ---- بهاء الدين بدوى

الأولة جوة الحشـــا 

بين الضلوع شيلتيني 

والتانية في طفولتي 

وفي صبايا رعيتيني 

والتالة أنا محتاج لك

ياأمّة ليس سيبتيني

الأولة جوة الحشا 

بين الضلوع شيلتيني 

وكنت جنين ..

والتانية في طفولتي 

وفي صبايا رعيتيني 

بكل حنين ..

والتالتة انا محتاج لك 

ياأمّة ليس سيبتيني 

وأقول يامين ..

الأولة انتي .. 

والتانية انتي ..

والتالتة جنة ربنا 

مخلوقة ليكي انتي

يااااااأم موسى .. 

ياااااأخت هارون .. 

ياالسيدة زينب .. 

يابنت سيدنا النبي 

ياأم الحسن والحسين 

يامدد الأمومة الساري 

في كل زمان ومكان 

يارحمة الرحمن .. 

يانفحة الحنـّان ..

منين أجيب الكلام 

اللي يوفيكي 

وفين أشوف الحنان 

اللي ملا عينيكي 

حسيت مرارة اليتم 

والغربة بعديكي 

امي يانبع حنان .. 

روحي في شوق ليكي 

دي جنة الرحمن 

من تحت قدميكي 

حضرة نبينا الحبيب 

وصانا برضاكي 

وتعم بركة وخير 

بسر دعواكي ..

أمي يابحر الحب 

ضميني بايديكي 

اشتقت ليكي كتير 

وفين الاقيكي 

اشكي لمين الأنين 

ولمين أبوح بالنوح 

وأنا اللي وقت النوى 

كنت اشتكي ليكي 

ومنين أجيب لي حبيب 

ومين يضاهيكي 

بكيت ياأمي كتير 

وبدمعي بارثيكي 

لو الدموع حتفيد 

بحور ماتكفيكي 

ومهما طال الزمان 

أبدا ماحنساكي 

نور ابتسامتك ياغاليه 

نـوّر مُحياكي 

كانت ابتسامة الرضا 

شمعة خطاويكي

ياصابرة عل الأيام 

الله يجازيكي ..

ياما صبرتي سنين 

ولا حد حاسس بيكي 

مديتي للمساكين 

بالخير أياديكي 

وجمعتي شمل بيوت

الله يحييكي ..

خليتي كل الناس

حتى اللي بلا احساس 

والله حبوكي ..

الله ينور ثراكي 

والجنة مثواكي ..

ياللي زرعتي في روحي

الروح والريحان

ياللي سكنتي في قلبي

والعقل والوجدان

أهون عليكي ياغالية

تفوتيني للأحزان 

والله بعدك يا أمـّـــة

اضيقت الجدران ..

مين ليا يواسيني 

في غربة الأزمان 

وفين حألاقي زيـك 

في الحب ياأم الحنان 

وعزايا انك ياطاهرة 

في جنة الرضوان .