مبقاااش ، بقلم / محمد الساعي

مبقاش في قلبي كلمه

تتقال او تتحكى

والعين ولا فيها دمعه

نشفت من البكا

بابكي والدنيا سامعه

وبقينا ف معركه

واشكي حالنا لمين؟

لله المشتكى

****

صراعات .. قتل ودمار

والسلطه صبحت شهوه

نقتل ونشعل في نار

ونسينا اننا اخوه

نتباهى بالانتصار

على العدو الجبار

مبقاش معانا اختيار

غير بس بالقوه

****

ملعون ابوك يا كرسي

ياللي بتقتل ولادنا

ملعون ارهاب بيحرق

وبيدمر بلادنا

ملعون صوت الكآبه

ملعون قتل الغلابه

وبقينا ف وسط غابه

والهم أصبح زادنا

****

امتى نفوق ونحس

قبل الآوان مايفوت

ماشيين كده بالعكس

اخرتها قتل وموت

مدوا الايدين مع بعض

إدوا مساحة وِد

جمعانا نفس الأرض

نفس الكلام والصوت

****

يامصر وانتي اللي همي

قلبك كتير موجوع

افديكي يامه بدمي

وبقلبي بين الضلوع

حزين على اللي جرالك

والهم غير في حالك

ياريتني يامه بدالك

ولا اشوف في عينك دموع