مش باقي ، بقلم / محمد محمد الساعي

مش باقي مني غير دموع

ونيران بتشعل في الضلوع

وضحكه تتمنى الرجوع

لكن خلاص مالهاش مكان

****

مش باقي مني غير وجع

وقلب م الحزن اتصدع

راح فين امانك يا جدع

والنخوه والذوق والحنان

****

مش باقي مني غير حروف

باكتب بها وانا كلي خوف

كرهت نفسي والظروف

وكرهت اي ضعيف جبان

****

مش باقي مني غير بلد

وصبر على صبر اتولد

وضهر م الهم اتجلد

وشبت انا قبل الاوان

****

مش باقي مني غير صدى

وصوتي مش لاقي المدا

ولا حد قام لبى الندا

والخوف بقى غول م الغيلان

****

مش باقي مني غير خرس

وكلمه كات زي الجرس

والآهه جوايا فرس

كسيح ومش قادر يبان

****

مش باقي مني غير وطن

يتباع وليه بأرخص تمن

خنقتنا آآآآه ريحة العطن

امتى يعود لينا الأمان؟؟؟

امتى يعود لينا الأمان ؟؟؟