مشهد أفقي من الأحداث ، بقلم / محمد محمد الساعي

مشهد أفقي من الأحداث

(المشهد الأول)

ـــ الوو.. آماي .. بالجوود

ـــ مين؟ ولدي محمود؟

كيفك يا ضناي

مش قلت إتك ع العيد ده جاي؟

ـــ معلش يا ست الكل

مش هاقدر انزل ع العيد

عندنا طوارئ جامده يا امي

والبركه في اخويا سعيد

أصله أكيد

راح ياجي عندك في العيد

ـــ حتى سعيد يا ضناي مش عارفه

راح ياجي ولا مايجيش

فات اسبوع والتاني يا خوي

والتالت ولا كلمنيش

ــــ إدعيلي يامه الخدمه تعدي

وارجع ليكو.. لداري .. لأرضي

ـــ بادعيلك ياضناي تعود

لاجل مانفرح بيك ونشوفك

احلى عريس يابني يا محمود....

(ــــ المشهد الثاني ـــــ)

ـــ الوووو آماااي ...

ـــ ولدي سعيد ؟؟ وينك يا ضناي

مش قلت هاتاجي في العيد؟

ـــ العيد مش هايعدي عليا

غير لما تعود الشرعيه

انا هنا يامه وسط صحابي

معتصمين

ـــ بتقول مين؟

معتصمين طب كيف يا ضنايا

دايما تاعب قلبي معايا

ـــ يامه الحق لابد يعود

بس قوليلي كيفك انتي وكيف محمود؟

ــ محمود برضه سايبني وقالي

مش راح يقدر ياجي في العيد

ـــ عارفه يا امي ايه هو العيد؟

لما ارجعلك وانا شهيد

ــــ يتقول ايه هاتقطع قلبي

انا عايزاكم تفضلوا جنبي

طيب لما تموت يا ضنايا

مين يدفني ومين يتقبل فيا عزايا؟

ـــ طب يامه سلام

علشان شيخنا ابتدا يلقي

احلى كلام

ـــ اتوحشتك قوي يا ضنايا

نفسي في يوم يا سعيد ماتعود

ترجع وانت ف إيد محمود...

(المشهد الثالث) يوم فض الإعتصامات

ــ يالا شباب ... الساعه سابعه

بعد النهضه نروح على رابعه

بجد تعبنا اعتصامات

ــ بس ياباشا صعب علينا

نموت ونمَوِّت حد بادينا

علشان ايه مش احنا اخوات

ــ طب ماتقولي كده يا محمود

هما معاهم ليه خرطوش وسلاح وقنابل ويا بارود

احنا بنعمل لاجل بلدنا

ونموت شهدا لاجل تعود

ـــ عندك حق يا باشا و يالاِّ

احنا معاك وتُكالنا على الله

" دخلوا بسرعه .. بعد النهضه قوام على رابعه .. ضرب النار مش عارفين فين ولا منين .. فجأه سعيد لقى محمود أخوه قدامه .. وياه سلاحه والخزنه مربوطه في حزامه .. حتى سعيد وياه رشاش .. مش مُهتم انه يموت بصوا لبعض وقالوا ف نفس الوقت : بلاااااش"

(المشهد الأخير)

ــــ جاي تقتل اخوك يا محمود؟

قلبك طاوعك؟

ــــ ايه يا سعيد حوش رشاشك عني يا اخوي

بتقول ايه؟ واللهِ ما سامعك

ـــ انت معاهم جاي تقتلني

ـــ لأه يا خوي حوش رشاشك هايموتني

ـــ انا مش ماشي من هنا يا سعيد

حتى ان مت يا خويا شهيد

ـــ اسمع بس ياخويا كلامي

واخرج آمن يالا قوام ماشي قدامي

ـــ ابعد عني .. مش باعتينك يابن ابويا عشان تقتلني؟

ـــ لأه يا خوي مش راح اسيبك

لازم تطلع قدامي حالا

لما تموت طب ايه هايفيدك؟

ــ ابعد عني يا حوده احسنلك

ـــ مش راح اسيبك تودر نفسك

"فجأه رصاصه جات في جبين الواد محمود ... نفس اللحظه اخوه برصاصه ف قلبه اتصاب

بصوا لبعض وشبكوا ايدهم قبل الموت .. وقعوا ف احضان بعض ياخلق بدون اسباب

كانوا نوَّارة الحلم لقلب الام الغالي

قلب الام اتقطع علشان ماتوا لاتنين

عايشه ف حزن وقهر وليل اسود طوالي

نفسها تعرف ليه بيموتوا وعلشان مين؟

ماتوا وكل مافيهم فاكر

ان الحق معاه

بس الحق ياعالم تايه

ومحيرنا وراه

ياللي بتقتل اعرف انك زيك زي قابيل

تقتل اخوك والدم ف ايدك بقى شلال

لسه بلدنا عايشه تمللي ف اسود ليل

ربنا قادر بس بإيده ... تتغير احوال