ياشعب اتوحد بقلم/ عبدالهادى الشعراوى
كتر الكلام ياهوه
والكل بيخون
فى اذاعة وتلفاز
كله بيتلون
والدمع جوه العين
على دم مفروش
فوق رمال الوطن
للجرح بكون
آه ياوطن مبطون
عربد فيك المجنون
بباروده واطماعه
الله يكون ف العون
ياشعب اتوحد
انفض بايدك السوس
طهر تراب وطنك
اقضى على الهكسوس
شوف صرخة الملايين
فى كل الميادين
بكفاية بقى تخوين
الشهدا دولت مين
دا هما حراسك
اهلك ومن ناسك
درعك مع فاسك
وللوطن حارسين
قسما برب الدين
الكل فيك طمعان
لو شقوا يوم صفك
هتضيع مع العنوان
وانت ياابن النيل
ياما قالوا فيك مواويل
والارض ارض امان
مذكورة ف القران
مذكورة ف الانجيل
فى رباط ليوم الدين
ياشعب اتوحد
بكفاية بقى اكفان
صد التتار وانهض
اقضى على العدوان
امريكا ويا الغرب
عايزنها تبقى حرب
نضرب فى بعضينا
ويقسمولنا الدرب
ياشعب صحصح فوق
علم الكنانة فوق
اوعى فى يوم ينزل
باكى او مخنوق
لحسن ساعتها تكون
محتل عبد زليل
وتلاقى ابن الدون
ماسك بايده الكيل
ياشعب اتوحد
قبل الوطن ما يضيع
دىارض سينا البكر
غاليه ومش للبيع
دى حضننا الدافى
ورملها الشافى
دم الشهيد توبها
مفرود على اكتافى
ياشعب اتوحد
سيبك من الخلافات
بص شوف المشهد
دى مهد الرسالات
ليست هناك تعليقات