غراب البين ، بقلم / سيد عبده

غراب البين غراب اسود طالعله نابين

.... وراح يلطش في طير الله .

... نكش شعره

وسن سنانه

عل العصفور

.... وعصفورنا ضعيف خالص

كبيره قمحايه وقشايه

وله كتاكيت في العشه

بيجري عشان يغديهم

غراب البين نتش اكله

وكمان اكل غدا اهله

وشاف العركه الهدهد ..

نظر نظرة المحتاس وقام طاير

وحط رحاله لابو قردان

انت اكيد بياضك ده مش رسمه

اكيد انت ليك عندي حاجه مهمه

غراب البين سرق الاكل من العصفور

غراب البين صبح حاكم الحته والميدان

ابو قردان رفع راسه وميلها

وحركها علي الجانبين

غراب البين صبح حاكم

امتي وفين

انا راح اجيب زعيم الطير

تعالي معايا عل القمه

وراحو طايرين

صباحك زين يا اميرنا

يا نسر الكون

يا طاير للسما السابعه

غراب البين رجع تاني للجبروت

رجع يقطع الارزاق علي العصافير

.......................... هاتولي الزفت غراب البين

جري الحراس علي المدعو ا

وقبضوا عليه

وجه مسكين ناكس راسه

اوامر نسرنا العالي

انا الخدام في بلاطك الغالي

داير تلطش في طير الله

تسرق وتنهب باسمنا ليه

اميرنا الغالي انا مؤمور

ادور علي الخاينين

بيدعوا عليك يا مولانا

وبيقولو يسقط المجنون

____ انا مجنون .......

مين يستجرا ويقولها

داير يقولها العصفور

هاتولي الخاين الواطي

وانتفوا ريشه وهاتهولي

وهجم الحراس علي عشه

وخدوه من وسط اولاده

وفي السكه ريشه بيطير

نتفوا من ساسه لراسه

................................... يا سيدي انا مظلوم

انا ما قلت شيء خالص

هو الحرامي وانا المسروق

اعملوا كده في الجاني

..................... غراب البين ده حارسي الامن

يقول الصدق ولو كان هو الجاني

خدوه ودوه علي السجن وبسرعه

علشان يكون عبره للتانين

ابو قردان قال امين

كمان الهدهد استغرب

وعرفوا ان الصدق خلاص شيء نادر

وان النسر متغمي

وغراب البين بقي الحاكم

ومتخفي في ضل النسر

ودار الخبر في كل مكان

غراب البين غراب اسود طلعله نابين

غراب البين غراب اسود طلعله نابين