قومى يا مصر ، بقلم / هناء نوار

و فيكى يا مصر كام ثوار

و مين حيكمل المشوار

مانيش عارف أصدق مين

و اكدّب نفسي ولاّ احتار

أسمع لدول أصدقهم ..

و ابص لحالهم استعجب

و اشوف الفرحة فِ عيونهم

و انا مش قادر استوعب

و دول إخوان و بينادوا

بإسم الواحد القهّار ..

يشوفوا الدنيا بعيونهم

و تسرقهم أمانى كتار

يقولو الدين و تلقاهم

حياتهم كلها أسرار

و صور عمّالة تتوزع ..

لكلب خسيس عدو غدار

عايش مرتاح و مِتهنّى

فيه بينّا وبيه دم و طار

و لسة الشعب مستنى

يلاقى بعد ليلو نهار

و امتى يا مصر حتحِنّى

و ترحمى شعبك المُختار

ما تيجو يا خلق نتوّحد

و نترحّم على الأبرار

تعالو نثور على نفوسنا

و أخلاقنا اللى ابتدت تِنهار

بدال ما الأخ يقتل أخوه

و يبقى الجار معادى الجار

خلاص يا اخواننا مش قادر

دا بير غويط و مالوش قرار

حيتان عمّالة بتطاحن

فِ لعبة قط ويّا الفار

و امتى يا مصر حتقومى

و امتى نكون معاكى احرار !!