ابن الشهيد .... بقلم / سيد نصر

بقلم / سيد نصر

 

ابن الشهيد
................................
سنة عدت عن النكسة
ولسه مانعرفش
أبويا عايش والا حي
... ولو كان حي
ليه مارجعش
راحت المستشفي العسكري
لمحو لها أنه فقيد
وحكمه حكم الشهيد
الدنيا اسودت في وشنا
والجيران اتنكروا لنا
وبعضهم اتعدوا علينا
ياناس أنا ابن الشهيد
اللي باع روحه عشانكم
ومات بعيد
العملية ادهورت معانا
واشتغلت امي كام شغلانة
وكل ماتروح تسأل عن القبض
لسه مافيش والا مليم
حتى ولو اعانه
اتمرمطت وتعبت معانا
وخافت علينا
ورجعت البلد بينا
وحولت من المدارس لينا
كنا في مصر
بنلبس مريلة
الواد زي البنت في المسأله
واول يوم رحت لابس المريله
ده اول يوم ليا في البلد
العبال ضحكت عليا
وده بنت ولا ولد
راحت خدت من مرات خالي
جلابيه لابستهالي
وحاجة صغيرة فاضلالي
لازم اعوج لساني
كنا زي اللاجئين
وكانت فيه في المدرسه بنتين
كانوا اصحاب الاتنين
واحده جميله وبيضا
وبتعطف عليا وتحبني
والتانيه سودا ووحشه
وتكرهني كره العما
وتسبني
وفي يوم قالوا هايطلعونا رحله
ويدخلونا السيما
رحت سقت على امي
طوب الأرض والسما
تديني تلاته صاغ ونصف
وبعد المحايلة وبوس الكف
وافقت
وراحت خدتهم م الجيران
على سبيل السلف
والمنحوس منحوس
قديما
لارحنا رحله ولا شفنا سيما
يااستاذ امي بتسلم عليك
وبتقولك طالما مافيش رحلة
ولا يحزنون
هاتونا الفلوس احنا مزنوقين
امش ياابن كذا وكذا وستين
لا فيه فلوس ولا فيه طين
ياناس حرام عليكم انا ابن الشهيد
اللي باع روحه عشانكو
ومات بعيد
وفي يوم ضاعت حاجه من المدرسه
قالت البنت السودا للمرسه
اللي خد الحاجه دية الواد الجديد
واحلف على كدا برب السما
تعالى ياكلب وشك للحيط
هاوديك في حديد
فين الحاجه ياملعون
أنا مظلوم واليوم ده
كنت غايب بالتحديد
وكل مصيبه تحصل في المدرسه
الواد الجديد الواد الجديد
الواد الجديد الواد الجديد
ياناس حرام عليكو
أنا ابن الشهيد
اللي باع روحه عشانكو
ومات بعيد
بعيد بعيد
بعيد