سامحيني يا امه ،،، بقلم / وائل عبدالمنعم

سامحيني يا امه

سامحيني علي بُكايا

في قلب القصيدة يا امه

وكلامي اللي تاه

ما بين الكسرة والضمه

وضلوعي اللي كسرتها

الاحزان من ضمه

وعلي حبستي في وحدتي

وخوفي من اللمة

سامحيني علي وطني

الشريد لما

شوفته وشافني

ومعرفنيش يا امه

سامحيني سيبت

ميدانك للي خانك

سيبت قلبك

بين ايدين اللي هانك

وخسارة تقولي عليا ابنك

وأنا جبانك

لما شوفتي الموت

وحدك

ومقدرتش ابقي

مكانك

اللي ماتو.... عيالك

واللي عاشو ... اندالك

واللي اتحبس ... نيلك

واللي اتسرق ...ميدانك

ما تقوليلي يا امه ثورتك

كانت علي مين؟

ع الطغاه الفاسدين ؟

ولا تجار الميادين؟

ولا ثورتك جابت مين ؟

متقوليش الغُر الميامين

وقوليلهم راجعين يا امه

ولادك تاني الميادين

راجعين نشتري حياتك

بموتنا

معدش فيها سُكات

ماحنا ياما سُكتنا