" ساكته ليـــــه؟!" بقلم/حلمى قاسم

يا بلـــــــدنا يا حبيبــــه

فيكى حاجه كتير غريبه

بعد عز وبعــــــد هيبه

صرتـــــى لعبه للرعاع
**
يا مدينتى يا سفينـــــــه

ياللى طول عمرك متينه

النهارده ليه حزينـــه

مركبك من غير شراع
**

ياللى فوق الدنيا كنتى

والتاريخ يشهد لك انت

ليه يا غاليه الوقت هنتى

وابتديتــــى ف الضياع
**
يعنى ايه ابن البساله

اللى عايش حالته حاله

يبقى عرضه للسفاله

والرزاله والخــــــداع
**
ليه نسيتى دم فارس

يوم ما كان للرمل حارس

لسه وجعُه ف قلبى غارس

الف سهم وعقلى ضاع
**
مين جرح قلبك و طيرك

باع هواكى لاجل غيرك

داس ورودك خان عبيرك

ضحى بيكى وليكى باع
**
ليه مشيتى سكه ضلمه

والقياده فيكـــــى ظالمه

من زمان صابره و مسالمه

ليه رموكــــــى للضباع
**
اصحى قومى يا ضحية

انهى فصل المسرحيه

شدى من حيلك شويه

رجعى المجد اللى ضاع

رجعى المجد اللى ضاع
****************