قصيدة : فــــُـــقْـــمَه كلمات / الشاعر / وائل حسين عمر

قصيدة : فــــُـــقْـــمَه

============

أنا مانشيت فــ الجورنال

على عتبه الشهره

يــَـدُوب ضحكه فــ عين فُقْمه

بتدارى فــ بطن حيتان

وكلمة صدق فى الورقه

دى ملفوفه فــ ايدين كداب

وليا فــ شرعكوا آيه

بإنى كيان

ولسه القلب بيخبط فــ دنيتكوا

لأنى وجود

وحاضر يعلن الغايب ببخل الجُود

ده مش موجود

وساكن نفسى يالعافيه بإيجار مشروط

بتدفعولى حِدّايَه

ومتوثق بختم البوم

عشان ما املكش غير بدروم

مالوش عمدان ولا مسنود بــ أى جدار

ده ورثى من فلوس باباه

ماتستغربش بإستنكار

عشان دى نهايته كت واضحه فــ فيلم العار

ونُــصْ لسان يكبرنى فــ وسط القوم

بعدسة زووم

وانا معرفش اشوف نفسى

حدود اركانى ترفسنى وتعمل منى كذا نسخه

واكون النجم فى الشباك

وكل الناس تقول إياك تعيش الدور

وحَسْدِنّى على الطَقّه

آكلها فى يوم وأسيب عشره

ووحده تصاحب الوَحْشّه

ونفس البدله بلبسها سبع لفات

وبستنسخها بالعِشْرّه

وبكره رسمته ع السبوره شجرة قات

وابروز كل أهازيجى على الحيطه

بلح أمهات

ولما إتخمر العكاز

تجرعته على فترات

و بين اللحظه والتانيه بَدَفّىَ بكاس سكرات

ورزقى يشوفنى متواكل فــ وش الارض

وعينى فــ عينه مكسوره

واطاطى البصله ليه وانحط

وبفرد ضهرى مـ الركعه وعودى إشتد

ألاقى الدنيا تعلنها بأعلى الصوت

يا وش السعد

بضهر الكف تصفعنى على كام خد

ومهما أفوق تشاورلى بأجرأ حته فــ إيديها

وتقولك خُــــد!!!!!!

الشاعر / وائل حسين عمر