صعلوك العاميه كلمات / وائل حسين عمر

لما بتكتب حرف فى كلمه
تلقى الكلمه رافضه الوحده
فــ تجرى تدور على بهجتها
جوه قصيده
وتعمل مزج بإيدها الدافيه
فــ يعلى مقامها بــ سجع وقافيه
فى جمله مفيده
يعنى الكلمه بدون الشاعر
تبقى بليده
فيشكلها ويرسيها على موانيها
وتبحر فــ جنون المعنى
لا بيعنيها الموج الهادر
ولا اعصار يضرب فــ سفينه
ولما اتكسرت دفة جيدها
يفضل فيها لفظ( لعل ) أصله قائدها
و تغوص دوغرى فــ الاشجان
تلقى محار اشكال والوان
فــ تعريه وبلا إستئذان
ويخرج منها الــ لولى ويسعى
فــ يطلب إيدها بمهره الفصحى
والعشق اللى معشش فيهم
دايما يقسى
ويعلن رفضه فــ بيت الطاعه بالتبعيه
زى ما شعلل نار الغيره بالتوريه
والمأذون صمم عــ الزيجه
بكلامه المسرود بالنثر
حتى إن كان معجون أميه
واللى يبارك هذا العرس
عمك نجم
صعلوكنا فــ شعر العاميه