رميت طوبتي .... بقلم / بسمة شعبان

بقلم / بسمة شعبان

 

على قلبى يا امه
... زكايب و لمه..
من الهم لما بتقتلنى قتل
ولما تهاتى وتصرخ آهاتى بشوقى للمه
أنادى عليكى
ألاقى عيونِك بترفضلى ضمه !!
وتبعدنى عنِك
وترفضى خلِك
وقابل وراضى بهجرِك وذلِك
وشايل جراحى على الكف شيله
وقاتل طموحى ومايله بى ميله
حنانِك رمانى
وغيرِك تاوانى
وشيفانى ناوى أدوسلِك بلاد
واجبلِك قمرتى
تنور بى أرضى
لكنى ياغالية ما فرط فى عرضى
ما هقبل فى قهرى يقولوا انكسرتى
وجاهر بِحُبِك فى كل الموانى
وجالى فى حبِك على البر غاوى
وقالى قمرتك بتصبح تلالى ودايره بغيرك فى كل الموانى
من الذل شارب وفاضت كيعانى
واجيلِك وتانى أدوسلِك بلاد
والاقى فى حضنِك من الهم زاد ..
مع البله طينه وناويه العناد
أعاود لغيرِك
واخاطب ضميرِك
لكنك مُصره !! تزيدى الزكايب على قلبى لما
يفيض بى والاقى غيابِك غلبنا
وهجرِك وذلِك بيقتل غِلابنا
وغّلى الغرايب وغرّب شبابنا
وترفض قلوبنا تجيلِك فى لمه
ولو يوم يحنوا !! يجولِك وبيهم من الحزن لمه
نلملم جراحنا ونرمينا فيكِ
ونلعن حاضرنا ونلعن ماضيكِ
ونرفض ندّور فى بكره عليكِ ونتبّرا منك ونِكسر دهورنا
ونرمى شِباكنا لكل الخلايق
واعيشلِك مُخادع وحاضر وغايب
واغّيب ضميرى
اغّلب فى طيرى
واغّلى فى مهورِك وارحب بغيرى
ولو يوم تغيرى !! هقولِك غلابه!!!
وبيتنا فى حضنِك فى حضن الديابه
بياكلوا فى قوتنا
ويتمنوا موتنا
وقطعوا لسانِك وخربت بيوتنا
ولساكى عايزة فى حضرة جنابِك !!
أطاطى فى راسى واوقر غيلانِك !!!
سيبينى وفوتينى معفر جبينى
ورافع سنينى فى وش الاعادى
لحد اما ربِك يريدلى السلامه
وافوتك وافوتهم ليوم القيامه