بحلم يا بلدى بقلم : عبده جمعه

●▬▬▬▬ِA&Gஜ۩۞۩ஜA&G▬▬▬▬●

شوفى يا بلدى

يومى النهارده كان طويل

مقابلة و دوشة و كلامى قليل

مراجعه و صداع و قلبى يشيل

حاولت أحكى حالى

قالوا الحكاوى تزيد الهموم

فـ قررت أنام

نمت يا بلدى

نمت وحلمت

بإنى و أنك فى ليلنا الطويل

و عينك بتبكى

ونازلة دموعك زى البحور

و ماشية يا بلدى فى سكة متاهة

صبرك جميل

ما تنسى يا بلدى

أنسى اللى فاتك و أنسى العذاب

وحاولى يا بلدى تنسى الأسية

ده عشقك يا بلدى أمانة فى إيديا

بحق اللى بينا يا بلدى و بينك

وحق الكلام

و حق الرسايل

طب و حق شعرى اللى ساكن ضلوعك

و الا حق قلبى اللى سهر جفونك

و الا حق قلمى اللى جابلك حقوقك

و إلا سلاحى اللى موت عدوك

يا بلدى و حبيبتى

و وطنى اللى غالى جدا عليا

بموت فى أكلك

وفى شرب شايك

و فى قهوتك

ده لما صداعى يجينى ساعة العصارى

بكون عايز انام

وارجع أحلم واشوفنى تانى

واخدك فى حضنى فــ راحة و وئام

ده أنا جوا حضنك بنسى الملام

تانى حترجع تقولى حنام

ما تسيب لى دورى

وماله يابلدى

ما لسه بقولك دى ساعة العصارى

ما هوده نهارك وهو نهارى

نمتِ يا بلدى

نمتى و حلمتى

وقومتى و قولتى

حلمت يا ولدى بإنى سفينة

سفينة و حزينة

وفى بحر عالى

و كله عواصف

و موج فى موج

و شطى بعيد

مش قادرة أشوفه

و أمد إيديا و اشوف دفتى

يمكن تحود

يمين أو شمال

شوية و توصل

باينى ضعت

ونزلت دموعى

و فضلت أبكى

ما أنا غصب عنى خلاص أستويت

بغلبى أنحنيت

و طلعان عينيا

و صعبان عليا

و شايفة طريقى خلاص ينتهى

ما انا لسه تايهه

وباسأل يا ولدى

فين سكتى

ما بقتش عارفة

أَحَود يمين ،،،، أَحَود شمال

والا أتن ماشية فى سكة ندامة

و ارجع أدور

أدور و أدور

دى سكة سلامة

لأ يا بلدى

يا ولدى ما تسكت

كفاية تعبت

ما تسيبنى أصحى

و يمكن أفوق

و أشوف الحقيقة

و أعرف يا ولدى أحل أمورى

ده عمرى و يومى

يا دوب أوله

ناسى يا ولدى ليلنا بطوله

حاطارد ظنونك

وأعقل جنونك

وأمحى يا ولدى بإيدى همومك

طيب يا بلدى

نسيتى حصانك

ولدك شهيدك

محمد و مينا

يوسف و حنا

ناسية الجوامع

ناسية الكنايس

و عهدى معاك

ما انا كنت أمنك

و حارسك و صاينك

و بابك و ضهرك

فى و قت المحن

وخدتك فى حضنى

و أطبطب عليكِ برمش العيون

و حلمت ياما

بإنى و أنك علم البلاد

و مسكت إيديك

ورحت بايسها فى سفح الهرم

و أدى القناطر

و ده رمل سينا

ده لما ينادينى

بقوله تمام و تعظيم سلام

ما انا سلاحك فى وقت المحن

و عمرى فداك

ده ياما و ياما

أنا دوبت فيه

و مت فى سبيله

و مستعد أموت

لكن يا بلدى بس فى سبيلك

ما أنا حته فيكِ

وحته عليكِ

وحته يا بلدى فى قلبى شايلها

و ربك عالمها

بحبك بحبك بحبك يا غالية

بحبك يا غالية ،،،، زى العلم

زى القلم

وزى كلمة صافية بتمحى الألم

و تشيل من قلوبنا كلمة ندم

بحبك يا بلدى

يا روحى و عقلى

و فكرى و ظنى

يا زهر القرنفل

ولون البنفسج

يا بلد أنظلم

ما أنتِ أميرتى

و أحلى صباح

بنور ربى لاح

ورفرف جناحى يدارى عليكِ

و قولنا كلام

بهمس العيون

بحبك بقلبى ومن جوه قلبى

يا أطهر و أنبل وطن أتخلق

واتعلقت بيه

ما هوه سفينة نجاتى النهارده

باقولك يا بلدى

و أميرتى و مليكتى

حاولى تفهمينى

و عقلى و عقلك خلاص يتنسوا

فهمتى يا بلدى أنا أبقى إيه

و مين و أزاى و ليه

و أوعى تقولى عليا نصيحة

طب لو نصيحة

تعالى و خديها

و يقفل قلبى عليكِ البيبان

عارفة بلدى

ملامحك شايلها فى قلبى سنين

وحبك معايا

وهو ضميرى فى وقت المحن

وقلبك معايا

ده عودى يا بلدى فى وقت الشجن

ولادك يا بلدى

محبة و سماح

وقصة نجاح

بأدور عليك

فى كل الطرق

و كل الوجوه

و أدينى لقيتك

جريحة و حزينة

و نبضك ضعيف

ما تقولى يا بلدى بجد أنتى مين

هو أنت بحر و شطه الجمال

والا أنت همسة فى بحر المحال

والا أنت نسمة ،،، هوانا العليل

أكيد أنت ضحكة ،،،، و فيها أمال

أوعى تكونى نجوى

ده حبى اللى تايه عنى سنين

أكيد أنتى رانيا

تحية فراعنة

ده عمر المحبة ما كانت بمال

و الا إيمان

ده بحر الأمانى شطوطه المحال

و إلا أنتى ريم

حبيبة وصديقة وآية م الجمال

أوعى تكونى نشوى

و إلا منال

و إلا أنت بشرى زمانى السعيد

و جاى من بعيد

و أوعى يا بلدى

أوعى تقولى علينا أصدقاء

ده إحنا حاجة تانية

وربك ،،،،،،،،،،،،

و حبك ،،،،،

ما أقول وصفها ،،،،،،

ــــــــــــــــــــــــــــــــــــــ

أ / عبده جمعه

●▬▬▬▬ِA&Gஜ۩۞۩ஜA&G▬▬▬▬●