انا الفقير : بقلم / حلمـــــى قـــاســـم

"انا الفقير"

*********

انا الفقير ودى قسمتى

من يومى غرقان ف الهموم

الفقر عارف سكـــتى

بصحى وابات فيه كل يوم

وتملــــى راصد خطوتى

مهما اعاتب فيه والــــــوم

يعند ويسعى لمحنتى

ومن كتر قربه ناحيتـــــى

اصبح صديقى وعزوتى

نسيت معاه شكل الفرح

والضحكه فارقت شفتــــى

ضهرى اتحنى قبل الأوان

تاهت ملامـــح سحنتى

وبرغم فقرى ووحدتـــــى

صابر وراضى بقسمتى

ساكن ف عشه من صفيح

والفرش قُطعه من الحصير

واللقمه حاف من غير غموس

والميه كوز من بطن زير

ولا يوم شكيت ولا قولت اااه

ولامــره نزلت دمعتى

انا الفقير...ودى قسمتى

الفقر عادى ف بلدتــــــى

مرض و معدى داء خطير

وتملى ساكن حتتــــى

ملهوش علاج ولا له خبير

ولا له وطن غير دولتى

شيلنا الامير جيبنا الامير

غيرنا كام منصب وزير

والفقر برضـــــه بينتشر

زى النيران ف كوام حرير

اااهن وااااه يا غربتــــى

لحد امتى يا حال مرير

ولحد امتــــى يا دنيتى

راح اعيش فقيــــــــر

بحلم وحلمى مش كبير

لا انا راجـــــــــى مال

ولا حتى نومه فوق سرير

انا نفسى الاقى بسمتى

واعيش يومين مع فرحتى

واظن حلمى مش عسير

**********

قلم/حلمى قاسم