الجـُــودْزيــلاّ خيال ف السيما بقلم : وائل حسين عمر
الجـُــودْزيــلاّ خيال ف السيما
شـُـغل أونطه
لَمّا تِشُوفه تصدّق نفسك
مثلا مثلا
تلقى الفارس يفتح عَكّا
بضربه مطوه
والسنيوره تحب الاحدب
حُب أونطه
وآخر الفيلم تلاقى سِفَاحهُم
مرمى فــ شنطه
وانت بتضحك وبتستوعب
وبتقبل أن الشمشون
يتحزم مع أى دليله
وَهْم الصوره
بـــِ يخليك تلبس فــ الحيطه
وتصقف ويــّا الكومبارس
عــ البرص اللى بيشرب كِينــَا
ويحليلك نُص دماغك
الموزونه بالتعميره
أمّا النُص التانى إتمركز
حواليين دايره تِشِّل طموحك
وأنت مِسَلّم أمرك ليهم
مع أن الساكن جواك
حلم حقيقى
مارد قادر على تجويدك
و الاحلام بتنادى عليك
إركب يلاّ وابور الغيط
توصل دوغرى
قبل ماتغرس شجرة عمرك
جوه سجايا العصر الحجرى
تلقى فـــِ طرحك
تــَمْرَه عويله
تخرج كده من جوه السيما
قليل الحيله
تشرب كاسها
وتلعن ناسها
أصل شيوخها
زرعوا القمح فــ كاس البيره!!!
الشاعر / وائل حسين عمر
ليست هناك تعليقات