مسائيان مواطن : بقلم / محمود وحيد

مساء الخير يا بلادى

مساكى والمسا حالــــى

وهمك يا أمه موالـــــــــى

يأنام وأصحى على وجعك

وطول الوقت على بالـــى

مساء الخير يا بلادى

مسا أرضك بتتبـــــــــور

وزرعك الأخضر بيدمـــــر

وقطنك يا بلد غـــــايــب

وباقى القطن متــــــزور

مساء الخير يا بلادى

مسا قمحك وشاحتينـه

وفلاحك كره طينــــــــه

هجر أرضه وبنى عمـارة

عشان تكتر ملايينــــــه

مساء الخير يا بلادى

مسا إبنك ومتغــــــــرب

ومن جورك بيتهــــــرب

بيعرق فى بلاد أغــراب

وحلمه غريب بيتسـرب

مساء الخير يا بلادى

مساكى والمسا باقـى

هاكمل بكرة اوراقــــى

ولو كتب الإله موتــــى 

هاموت وبحضنى أشواقى

مساء الخير يا بلادى