"مسائيات مواطن" بقلم : محمود وحيد

""""""مسائيات مواطن"""""""

مساء الخير يا بلادى

مساكى والمسا واجــــــب

وحبك فرض على واجـــــب

صبرنا وصبرنا علقــــــــــم

وبردو الصبر مش عاجـــــب

مساء الخير يا بلادى

مسا ء الحيرة والريبــــــــة

وشرطة ما عادلهاش هيبة

بترمى سلاحها هربانـــــة

ومش خجلانة م العيبـــــة

مساء الخير يا بلادى

مسا قاضى ما هوش قاضى

بيصدر حكمه ع الفاضـــــى

ميزانه كفته مايلـــــــــــــة

وشعبى لحكمه مش راضى

مساء الخير يا بلادى

مسا ريس وما بيـــــــــــده

وحتى حاشيته ضـــــــــده

كلامه عكس أفعالـــــــــــه

وعدى فى السكوت حـــده

مساء الخير يا بلادى

مسا جيشك مفيش غيـره

وحلم الغرب تدميــــــــــره

عيونهم راصده وحدتنــــــا

وحاسدانا على خيـــــــره

مساء الخير يا بلادى

مسا وجعك على عينـــى

وحالك والله كاوينـــــــــى

يانادى المولى فى سجودى

ينجيكى ما يضنينـــــــــــى

مساء الخير يا بلادى